ວິທະຍາໄລເຕັກນິກ-ວິຊາຊີບ ແຂວງຈໍາປາສັກ ໄດ້ເອົາໃຈໃສ່ຢ່າງຕັ້ງໜ້າໃນການປະຕິບັດຕາມແຜນພັດທະນາ ອາຊີວະສຶກສາ ແລະ ອົບຮົມວິຊາຊີບ 2021-2025 ໃຫ້ໄປຕາມ 3 ລັກສະນະ, 5 ຫຼັກມູນ ຂອງກະຊວງສຶກສາທິການ ແລະ ກິລາ, ໄປຕາມວິໄສທັດທີ່ກຳນົດໄວ້ ເພື່ອໃຫ້ກາຍເປັນວິທະຍາໄລທີ່ສ້າງ ແລະ ພັດທະນາທັກສະສີມື ແຮງງານທາງດ້ານວິຊາສະເພາະທີ່ແນ່ນອນ ແລະ ມີຄຸນນະພາບ ຕອບສະໜອງໃຫ້ແກ່ສັງຄົມຕາມຄວາມຕ້ອງການ ຂອງຕະຫຼາດແຮງງານໃນທົ່ວປະເທດ ເວົ້າລວມ, ເວົ້າສະເພາະແມ່ນພາຍໃນແຂວງຈຳປາສັກ ຂອງພວກເຮົາ, ມີລະບົບການບໍລິຫານ, ການຊີ້ນຳໆພາທາງດ້ານການເມືອງ, ໂຄງສ້າງການຈັດຕັ້ງ ແລະ ລະບົບງົບປະມານແມ່ນຂຶ້ນກັບແຂວງ, ທາງດ້ານວິຊາການແມ່ນຂຶ້ນກັບກົມອາຊີວະສຶກສາ, ກະຊວງສຶກສາທິການ ແລະ ກິລາ.
ວິທະຍາໄລເຕັກນິກ - ວິຊາຊີບ ແຂວງຈຳປາສັກ ມີ 2 ວິທະຍາເຂດຄື: ວິທະຍາເຂດທີ 1 ຕັ້ງຢູ່ບ້ານຫຼັກເມືອງ ນະຄອນປາກເຊແຂວງຈໍາປາສັກ, ມີເນື້ອທີ່ທັງໝົດ 8.273,00 ຕາແມັດ ແລະ ວິທະຍາເຂດທີ 2 ຕັ້ງຢູ່ບ້ານຫົວແຊເມືອງບາຈຽງຈະເລີນສຸກ ແຂວງຈໍາປາສັກ ມີເນື້ອທີ່ທັງໝົດ 25.8331 ແຮັກຕາ ໄດ້ສ້າງກໍາລັງແຮງງານ ແລະ ພັດທະນາຊັບພະຍາກອນມະນຸດ ເພື່ອຕອບສະໜອງໃຫ້ທັງພາກລັດ-ເອກະຊົນພາຍໃນ 4 ແຂວງພາກໃຕ້, ຊື່ງປະກອບມີ 3 ພະແນກ ແລະ 6 ພາກວິຊາ ໄດ້ແກ່: ພະແນກບໍລິຫານ-ຄຸ້ມຄອງ, ພະແນກຄຸ້ມຄອງວິຊາການ, ພະແນກກິດຈະການນັກສຶກສາ, ພາກວິຊາໄຟຟ້າ-ເອເລັກໂຕຣນິກ, ພາກວິຊາກໍ່ສ້າງເຄຫາສະຖານ, ພາກວິຊາບໍລິຫານທຸລະກິດ, ພາກວິຊາກົນຈັກ, ພາກວິຊາໄອທີ ແລະ ພາກວິຊາບໍລິຫານການໂຮງແຮມ-ການທ່ອງ ທ່ຽວ, ການພັດທະນາຫຼັກສູດການຮຽນ-ການສອນມີ ລະບົບ 9+3, ລະບົບ 12+2, ລະບົບ 12+3 ແລະ ຊັ້ນສູງຕໍ່ເນື່ອງ.